« Et que cuer & amour vous donne,
« Et vous li devez pardonner
« Et le cuer & amour donner. »
Quant il m’ot tres-bien laidengié,
Et ſon parler bien arrengié,
Et dit toute ſa volenté,
Je reſpondi : « Par ma ſanté,
« Mes amis eſtes & mes ſires,
« Si ſerez de ma dolour mires ;
« Et Dieus vous a ci amené.
« Car ſi bien m’avez ſermonné
« Qu’en vérité je ne croy mie
« Que ma dame, qui eſt m’amie,
« Daignaſt faire une laſcheté
« Ne penſer nulle fauſſeté.
« Pour ce bonnement li pardoing
« De bon cuer, & m’amour li doing
« Et met en ſon tres-dous ſervage.
« Ne jamais, jour de mon aage,
« Pour perſonne n’en partiray,
« Ains ſuis ſiens & toudis ſeray.
« Et ſe j’ay créu folement,
« Je li ſuppli tres-humblement
« Que de bon cuer le me pardoint,
« Et que cuer & amour me doint.
« Et ſeur ce, je li eſcriray
« Si doucement com je ſaray,
« Et, vous en ferez le meſſage,
« Qu’en vous me ſi, comme en plus ſage,
« Et en milleur amy que j’aie,
« Et que j’aime d’amour plus vraie.
« Et ce li direz de par my,
Page:Machaut - Le Voir Dit, 1875.djvu/415
Le texte de cette page a été corrigé et est conforme au fac-similé.
[vers 8849]
359
DU VOIR-DIT.
