ville de Bigorre, et ay veu plusieurs malades aller ausdits bains qui sont reuenuz autant malades qu’ils estoyent auparauant : D’autre part si le feu est ceste année en vn endroit où il y aura quelque espece de mineral, et qu’iceluy aye vertu de guerir quelque maladie, peut estre que l’annee qui vient le feu trouuera vn autre mineral, duquel le sel ne pourra faire la mesme action que la premiere.
Voila pourquoy ie dy que les choses sont incertaines, d’autant que les eaux viennent de lieux inconnuz.
Et des eaux de Spa au pays de Liege, veux tu aussi dire, que la guarison d’icelles soit incertaine ? N’y a il pas iournellement des personnes malades de diuerses maladies, qui vont demeurer quelque temps audit lieu, pour boire de ladite eau, et s’en trouuent bien ? il n’est pas iusques aux femmes steriles qu’elles n’y aillent, afin de conceuoir.
Ta demande n’est pas à propos, par ce que les eaux de Spa ne sont pas chaudes : toutesfois, afin de respondre à ta demande, ie te di que si les eaux de Spa pouuoient causer vne conception aux femmes, elles feroient de beaux miracles. Ie sçay bien que plusieurs y sont allees boire de ladite eau, qui eussent eu plus de proufit de boire du vin. Ie ne dis pas que ladite eau ne soit vtile contre la grauelle, par ce que plusieurs s’en sont bien trouuez : et la cause de ce est d’autant qu’elle prouoque à vriner, et ne demeurant gueres à passer par les parties ordinaires, les matieres qui causent la pierre n’ont pas le loisir de s’assembler pour s’endurcir et lapifier. Aucuns medecins et autres personnes tiennent pour certain que lesdites eaux passent par des minieres de fer, et prennent cet argument de ce que la gueule de la source est tainte en iaune. L’argument est fort bien fondé comme tu l’entendras par les preuues que ie te diray cy apres. Il se trouue en plusieurs villages du pays de Liege des fontaines qui ont la mesme vertu : Mais les habitans de Spa ont publié la leur des premiers, dont il leur reuient vn grand proufit. Si ainsi est que la mine de fer ait telle vertu, il se trouuera au pays des Ardennes grand nombre de fontaines autant bonnes que les susdites : par ce que les terres du pays sont pleines de mines de fer, les terres argilleuses iaunes qui y sont, en rendent tesmoignage.
