faut noter que les terres argileuses de quoy l’on se sert pour tenir lesdites eaux, faut qu’elles soyent conroyees, comme ie te diray le moyen duquel ceux des isles vsent pour la conroyer. Premierement, ils ont vn nombre de cheuaux attachez à la queue l’vn de l’autre tout d’vn rang, et au premier cheual, pour la conduite d’iceux, y a vn homme qui tient la bride d’vne main, et de l’autre les touche tout à coup d’vn fouët, les faisant pourmener tout le long de la place, iusques à ce qu’elle soit bien conroyée : apres ils l’applanissent, et la mettent en telle forme qu’elle leur puisse seruir à tenir les eaux. Et pource ie t’ay dit que tu pourrois foncer ton parterre de terre argileuse, par faute de pierre, ou de brique, ie te parleray plus amplement de cecy en traitant du sel commun.
Et si mon parterre estoit paué de pierre, de brique, ou de terre d’argile, mon champ ne me pourroit seruir sinon pour receuoir les eaux, et ce seroit grand dommage à vn panure homme, qui n’auroit qu’vn peu de terre, de l’employer en vne fontaine seulement.
Si tu me veux croire, ledit parterre te portera grand profit et vtilité ; à sçauoir en y plantant grand nombre d’arbres fruitiers de toutes especes, et les planter par lignes directes, et puis paueras ton parterre, et à l’endroit d’vn chacun arbre, tu laisseras trois ou quatre pouces de terre sans estre paué, afin que ledit paué n’empesche l’accroissement des arbres. Et quand cela sera fait tu pourras faire apporter sur ledit paué, de la terre iusques à vn pied de haut et d’auantage ; apres tu pourras semer telle espece de legumes que tu voudras, et par ce moyen les arbres croistront, et la terre fructifiera, et te portera plusieurs fruits, et mesme du bois pour te chauffer ; et n’y aura piece de terre de si grand reuenu, parce qu’elle seruira à plusieurs choses. Premierement pour les fontaines, secondement pour les fruits, tiercement pour le bois, quartement pour les choses que tu semeras audit parterre : que si tu n’y veux rien semer de ce que nous auons dit, semes y du foing lequel seruira de pasturage : et pour la fin, ce sera vn pourmenoir fort delectable, or voyla vne piece de terre qui portera cinq belles commoditez.
