portoit en soy quelque salsitude, qui faisoit cuire et gaster les yeux, semblablement la vapeur qui sort des rochers desdites montagnes apporte quelque salsitude és terres qui sont dessus, qui causent que les fruits qui y croissent sont plus salez, et de meilleur goust, et ne sont si sujets à putrefaction et pourriture, comme ceux qui sont produits és vallees, et ceux des vallees sont communement plus fades, et de mauuaises saveur, et sujets à pourriture. Et ce, pour cause que les terres des vallees sont suiettes à receuoir et donner passage és eaux qui descendent des montagnes, lesquelles eaux font dissoudre, et emportent le sel des terres desdites vallees, qui causent que les fruits ne sont guere salez. Item, les arbres qui sont plantez és vallees, ne peuuent porter si grande abondance de fruits, que ceux des montagnes, ou terriers hauts : et la cause est, parce que les arbres des vallees sont trop guais, à cause de l’abondance d’humeur, qui fait qu’ils employent leur temps et force à produire grande quantité de bois et branches, et cerchent le Soleil, et deuiennent plus hauts et plus droits, que ceux qui sont aux terriers hauts : aussi lesdits arbres des vallees en cas pareil n’ont point si grande quantité d’huile en leur bois, comme ceux des hauts terriers et montagnes. Voila aussi pourquoy ils ne bruslent pas si bien que ceux des hauts lieux, et ne sont lesdits arbres de si longue durée. Et si tu ne veux croire qu’il y aye du sel és fruits, contemple vn peu quelque arbre de Serisier, Pommier, ou Prunier ; si tu vois vne année qu’il n’aye guere de fruit, et que le temps se porte sec, tu trouueras ce fruit là d’vne excellente saueur : et s’il aduient vne annee fort mouillee, et que ledit arbre aye grande quantité de fruit, tu trouueras que ledit fruit sera fade, et de mauuaise saueur, et de peu de garde. Et cela aduiendra pour deux causes : la premiere est, parce que le tronc et branches dudit arbre n’ont pas assez de sel, pour en distribuer abondamment, à si grande quantité de fruit : l’autre, parce que l’annee a esté pluuieuse, et que les pluyes ont emporté partie du sel dudit fruit, comme il seroit d’vn poisson salé, qui seroit pendu à vne branche dudit arbre.
Quant est de ces raisons que tu m’as donnees des fruits, elles sont aisees à croire : mais de croire qu’il y aye du sel
