pour rendre la royne d’Eſcoſſe iuſticiable de la
royne d’Angleterre : Il n’y a homme de bon iugement,
qui ne die que ce ſeroit des pretendues couleurs
& recerches, pour ſe deffaire d’vne Princeſſe
à qui l’on veut mal. Car puisqu’elle a eſté auãt
ſa priſon en poſſeſsion, de ſe dire Monarque en
ſon Royaume, elle ne peut eſtre par la contrainte
tenue, qu’en la meſme conditiõ qu’elle eſtoit lors
de la premiere heure de ſon empriſonnement.
Ce ſont les loix du grãd Empire Romain, en toutes
les grandes guerres qu’ils ont eues par toute
la terre : C’eſt la raiſon naturelle qui le perſuade
aſſez à vn chacun. Et de pretendre auſsi qu’elle
n’eſt plus Royne, qu’elle a eſté priuee du Royaume par ſa
deſmiſsion, & par la deliberation des
eſtats d’Eſcoſſe : Ce ſont des traits que la Royne
d’Angleterre, ny autre Prince ne peut approuver,
ſans faire tort à l’authorité que tous les Princes
ſouuerains vſurpent & pretendent auoir, de iuger
& donner la loy à leurs ſuiets, non point eſtre iugez
ny receuoir la loy d’eux, ou eſtre cõtables de
leurs actions qu’au ſeul Dieu quoy qu’ils facent.
Tu ſcay bien que le noſtre s’en eſt ſouuent fait à
croire. Et en telles occaſions, il ſemble que les
Rois ſont tous vnis à reprimer & cõbatre le faict
des ſuiets : Tant s’en faut que la royne d’Angleterre
s’en puiſſe ſeruir pour s’approprier authorité
ſur le royaume d’Eſcoſſe. Il reſte donc à la royne
Marie Stuard, ceſte qualité de Royne ſouueraine,
non inferieure de la royne d’Angleterre, laquelle
par conſequent ne peut iuſtement cognoiſtre
ny iuger ſur elle : d’autant que le fondement
