Item le Roy de ſon coſté promettoit de regner
ſelon Dieu, & le peuple d’obeir au Roy ſelon
Dieu.
Le meſme ſerment & alliance ſe trouue faite
en l’Eſcriture ſous Ioſias & autres Rois. En ſomme
iamais ne s’eſt veu qu’il y ait eu homme eſleué
en degré par deſſus les autres, ſans auoir premierement
fait quelques promeſſes & ſermens
au peuple, ou à la nation à laquelle il eſtoit prepoſé.
On voit encores auiourd’huy les formules de
iurement de l’Archeduc d’Auſtriche, du roy des
Romains, du roy de France, quoy qu’elles ayent
eſté viciees par l’entremiſe de Meſſieurs les Papes
Romains.
Apres auoir veu l’origine & forme de la creation
des magiſtrats, voyons maintenant quelle
eſt la cauſe & occaſion, pour laquelle ils ont eſté
creez. Nous trouuerons qu’il n’y en a point d’autre
que le ſalut du peuple. Afin, ce dit l'Apoſtre,
qu’ils ſoyent en terreur & eſpouuantement aux
meſchans, & en ſeureté & conſeruation aux
bons.
Ariſtote en ſes Politiques dit tresbien : Que
tout ainſi qu’au Pilote, l’heureuſe & proſpere nauigation :
au medecin, la ſanté du patient : au Capitaine,
la victoire : auſsi au Roy le ſalut & conſeruation
du peuple doit eſtre touſiours deuant
les yeux.
Et partant le peuple ayant eſleu ou autrement
eſleué premierement, le Roy à ceſte fin, le Roy
auſſi eſtant obligé à telle condition toutesfois &
