quantes qu’il s’en deſuoye : quand de bon prince
il deuient Charles 9. quand ſeulement il prepoſe
fon priue au public : augmentant auec le detriment
du peuple ſes coffres & reuenus : lors l’obligation
du coſté du peuple eſt rompue : lors eſt le
peuple deliuré de ce qu’il deuoit à ſon Roy. Ne
pouuant l’Empire & gouuernement eſtre dit iuſte
& legitime, auquel l’on a tellement eſgard au
bien particulier du Prince qu’on en vient à intereſſer
le public de tout le Royaume.
Outre ce que dict eſt, il faut qu’vn Roy ſoit legitimement
appellé à la Royauté, ſelon les couſtumes
& loix du pais, pour pouuoir eſtre dit Roy
legitime. Autrement s’il vient à vſurper le ſceptre,
il ſe rend indigne du titre & des priuileges d’ũ
Roy Cecy ſoit dit tout en paſſant, en faueur de
ceux de Lorraine : ſur leſquels, comme tu ſcay mieux,
les predeceſſeurs de nos Valois ont vſurpé la
Couronne.
Or les Rois ſont appellez au royaume, ou par
ſucceſsion en lieux où le droit de regner eſt tranſmis
aux heritiers : ou par election : ou par ſucceſsion
& par election tout enſemble. Ceſte derniere
façon de creer les Rois eſt merueilleuſemẽt
à l’auantage & benefice du peuple : eſtant choſe
tout aſſeuree que là où le droit de ſucceſsion eſt
ſimplement obſerué, le plus ſouuent la Royauté
eſt tranſportee à perſonnes indignes, d’où ſort
vne infinité de malheurs & deſaſtres, nous l’auons
veu, nous le ſauons, nous le ſentons ſi nous ne ſõmes
ladres. Là où l’election ſeule eſt pratiquee,
on baille entree aux ſeditions & partialitez, deſ-
