L’hiſt. Voire. Mais auſsi le Pape leur en a baillé
la diſpenſe.
Ali. Comme ſi l’homme pecheur pouuoit rompre
la loy de Dieu & en diſpenſer les autres.
Quel ſeruiteur des ſeruiteurs de Dieu ! Tu verras
tu verras amy quelque iour que ce mariage du
Roy d’Eſpagne auec la fille de ſa ſœur & de ſon
couſin germain l’Empereur, qui luy fait naiſtre
des enfans, fils, neueux & couſins enſemble ſera
cauſe s’il plaiſt à Dieu de l’entiere ruine de Rome,
du Pape & de ſa papauté.
L’hiſt. Comment cela, Bon dieu ?
Ali. Le Roy d’Eſpagne mourant les enfans maſles
de l’Empereur ſont appellez à la courõne d’Eſpagne
(car de la fille nee d’Izabel de France, l’Eſpagnol
n’en veut point & ne croit pas qu’elle ſoit
legitime) Les enfans de ce mariage de la niece diront
que la Couronne leur appartient. Les legitimes
neueux leur repliqueront qu’ils ſont inceſtueux
& baſtards, partant ne peuuent ſucceder :
voire mais, ce diront les autres, le Pape en a diſpensé,
Le ſeruiteur, diront les legitimes (afin que nous
ne flattions plus) n’eſt pas par deſſus le maiſtre,
Dieu l’a defẽdu, le Pape ne le doit permettre, c’eſt
l’Antechriſt tant attẽdu. En ſomme, par ce moyẽ
là la puiſſance de ce faux paſteur ſera miſe en diſpute,
ſes abus ſerõt cognus, on ne les pourra plus
ſouffrir, & dieu ſcait le beau meſnage qu’il y aura
pour ce ſeducteur.
L’hi. Dieu nous vueille eſtre en aide, cela n’a que
trop d’apparence, on a bien fait autrefois la guerre
pour moindre choſe que n’eſt la couronne d’E-
Page:Reveille-matin des François, 1574.djvu/91
Le texte de cette page a été corrigé et est conforme au fac-similé.
45
D I A L O G V EI.
