Tres que aurat folche preſ ſa muller
E lo dus bon conſel e dreiturer
Quel non at giens de uoſ mal conſier
Que la reine alpaiſ preſ par le man
Premers apele oudin qui ſat german
Vai donne ta coiſine aqueſt toſan
Non me metrai en plait diſt el en uan
Car no moc ginſ ꝑ me ne non reman
Peza que fiſt de lui ſon caſtelan
E quil apreſt a faire le iug uiman
Folche diſt a conſel al capelan
Que leſ ſainſ li aport la flors a plan
E cil li aporteit ſor un fagan
Si deuſ maiut diſ el omnipotent
E icil ſaint qui ſunt ci aparuent
E tuit autre qui ſunt a deu ſiruent
An a alpaiſ aceſt que lun atent
Moſ corſ al ſon non iac tan carnalment
Par que honte i ogeſt ne ſei parent
Ne ioc ne faiſ a lei deſcouenent
La reine reſpont ben ou diſ gent
E eu la derai tei me trai garent
Donne multeſ merceſ de uoſ la prent
La leſpoſet lo conſ a tot ueent
De ſon cors danel daur e dargent
E det li oſcle tot ſun chaſement
E quan ia conquerret en ſon uiuent
Aquel ior adobet cheualers cent
Que caſcuns ac deſtrers e garniment
E qintane lor fait faire el prat narſent
Deſcu nue e doberc fort e luiſent
E coren i doncel cil de iouent
E unt por eſgardar cele autre gent
Qui ceſt plait a mogut gant mal eſcuel
Deſ caſtels ſunt au rei tui li caduel
E toteſ leſ citaz tro a mirguel
E girarz reſpondet eu que li tuel
Mais eu fera ben plan de tot ſeu uuel
La reine ot leſ moz ob eſ ſecuel
Laiſſaz odin aico poſ eu non uuel
Deſ que uerrai mon don le rei del uel
Sempreſ ſerai od lui tan bien cum ſuel
De cai torrem le plait en autre fuel
Nen ai ſoing que gabaz ſi eu men duel
E peſa li molt fort en ſa coraille
A la qintane ueit gant communaille
Cent donzel i unt fait qi colp qui faille
Anc negunſ ne falſet del oberc maille