Page:Rutebeuf - Oeuvres complètes, recueillies par Jubinal, tome I, 1839.djvu/494

462

NOTES

Por coi il voellent demorer ?
N’ont-il mie autant à sauver,
Ki bien volroit à droit garder,
En lor âme come en la moie ?
Mais il nous font souvent muser
Aussi com chius ki fait juer
Ce vilain à boute-en-coroie.

Che voit-on avenir souvent,
K’il ruevent chou faire la gent
k’il ne vauroient endurer ;
Il ont bien quis lor aisément
Et nous dient apertement
Que prendons la crois d’outre-mer ;
Mais che vous voel jou demander
Comment li hom se puet sauver
Ki tout jua d’autrui arghent ?
Miex li vauroit chi demourer
Que prendre la crois d’outre-mer
S’il ne se paie netement.

Je le di pour chevalerie :
Quant doient si ne paient mie ;
Si en font .i. poi à reprendre ;
Mais c’est par consel de clergie.
Ensi ne devroient-il mie
Faire la bone gent entendre ;
Car ki a droit velt le crois prendre
Il ne doit vers nului mesprendre,
Et s’il le fait il n’i va mie.
Ki l’autrui doit, s’il l’a ù prendre ;
Il li convient paier et rendre
U se crois ne le sauve mie.

Savés pour coi nous le dison :
Puis c’ons est en réligion
Et il a chainte la coroie,
N’avient pas k’il fache sermon
A nule dame en sa maison
Si n’est ensi que on les voie ;
Mais il n’ont cure c’on les oie ;
Ains se traient fors de la voie
Pour oïr lor confiession,
Dont rient et demainnent joie,