parfaitement, pour peu de temps, comme vne choſe qui luy eſt preſtée plûtoſt que propre ; Rien ne peut mieux exprimer cette verité que les belles paroles de M. de Balzac ; Que la loüange & la gloire appartiennent à Dieu en proprieté : Dieu ſeul poſſede la gloire avec ces trois conditions eſſencielles ; ſeul il ne la tire jamais de ce qui n’eſt point vn bien ; ſeul il poſſede ce bien ſans nul mélange de mal ; ſeul il le tient de luy-meſme.
Nous le confeſſons, grand Dieu, vnique Sauveur du monde ; la gloire ne nous appartient pas ; vous l’avez poſſedée de tout temps, & par tout ; vous l’avez meſme trouvée ſur la Croix, au milieu de l’opprobre qui nous appartenoit, & que vous avez voulu ſouffrir pour nous. Faites, mon Dieu, que nous ne la cher-
