aux medecins, si telles parties se peuuent ainsi cruellement oster sans mort, attendu qu’elles sont fort sensibles, ioint aussi qu’elles sont prochaines du cueur, toutefois la meilleure part est de ceste opinion. Si ainsi estoit ie pense que pour une qui euaderoit la mort, qu’il en mourrait cent. Les autres prennent l’etymologie de ceste particule A, priuative, et de Maza, qui signifie pain, pour ce qu’elle ne viuoyent de pain, ains de quelques autres choses. Ce que n’est moins absurde que l’autre : car lon eust peu appeller, mesme de ce temps là, plusieurs peuples viuants sans pain, Amazones : comme les Troglodites, et plusieurs autres, et auiourd’huy tous noz Sauuages. Les autres de A priuatif, et Mazos, comme celles qui ont esté nourries sans lait de mâmelle : Philostrate. ce qui est plus vraysemblable, comme est d’opiniô Philostrate : ou biê d’une nymphe nômée Amazonide ou d’une autre nômée Amazone religieuse de Diane et Royne d’Ephese. Ce que i’estimerois plus tost que bruslemêt de mamelles : et en dispute au côtraire qui voudra. Amazones, femmes belliqueuses. Quoy qu’il en soit ces femmes sont renômées belliqueuses. Et pour en parler plus à plein, il faut noter qu’apres que les Scythes, que nous appellons Tartares, furent chassez d’Egypte, subiuguerent la meilleure partie de l’Asie, et la rendirent totalement tributaire et soubs leur obeissance. Cependât que long temps les Scythes demeurerent en ceste expedition et conqueste, pour la resistence des superbes Asians, leurs femmes ennuyées de ce si long seiour (comme la bonne Penelopé de son mary Ulysses) les admonesterêt par plusieurs gracieuses lettres et messages de
