avec la bibliotèque de ses œillades amoureuses, que la princesse, se laissant prendre au glu de cest expert oyseleur, pour faire porter l’egrette de bœuf à son mary, rompant les bornes de la pudicité, luy donna un soir assignation de se rendre à la ruelle de son lit pour illec luy froter le busq, jouissant du loyer que meritoit la perseverance de semblables amours. Et advint qu’estant au lieu de l’assignation, sa dame luy print la main, laquelle attacha avec la sienne d’un ruban, incarnat ou fleur de lin s’il m’en souvient ; puis secouant et remuant son espoux, qui à ceste heure ronfloit melodieusement, l’ayant esveillé en sursault, luy dit : Monsieur, il me semble que vous m’avez dit une plaine hote de fois que vostre maistre d’hostel vous servoit si fidellement et gentiment que pour une plaine cuve de diamans de la nouvelle roche vous ne le voudriez perdre ; or, sachez à la bonne heure que c’est un perfide et meschant homme, m’ayant sollicité aujourd’huy de lui prester la courtoysie savoureuse au prejudice et honnissement de vostre honneur et du mien et toutes autres belles besongnes, etc. (Je vous laisse à penser en ceste belle paranthèse si le drolle, ne sçachant rien de tout cecy, se tenoit vilaine et lourde peur.) Pourtant je luy ay donné assignation dessoubs l’arbre de nostre jardin. Levez-vous promptement et prenez mes habits, l’alant attendre, deussiez vous demeurer jusques à une heure et trois minutes après minuict, car il m’a promis d’y venir aux despens d’abreger le peloton de sa vie. Cela fut dit, cela fut fait, et ce cocu in fieri, attendant de l’estre in facto, soudainement se botit et puis
