covenant que il eussent, ainz recommençoient la guerre quant li rois s’en estoit retornez en France. Longue chose seroit à raconter quantes foiz il furent vaincu et sormonté par armes, et se mistrent du tot en la merci le roi et donerent tiex ostages com il demandoit. Les messages que li rois i enveoit reçurent plusors foiz, et furent aucunes foiz si donté que il promistrent que il recevroient la foi chrestienne ; mais ausi come il estoient prest et legier à ce faire, ausi legierement aloient-il encontre les convenances, si que l’on ne pooit pas bien savoir auquel de ces ii choses il estoient plus prest. Ou premier an meismes que la guerre fu commencié firent-il ceste mutation ; mais li granz cuers et li fermes propos du roi qui toz jors duroit uns meismes, et en prosperité et en adversité, ne pot ainques estre vaincuz par leur legierté, ne lassez pour paine ne pour travail que il li feissent, car il ne souffri ainques que il portassent sanz paine nul domage que il receust par eus et que il ne le venchast tantost, ou par lui ou par ses menistres. Totes voies, furent si mené à la parfin que tuit li plus grant et li plus noble, qui la guerre avoient toz jors maintenue, vindrent à merci et se mistrent du tot en sa subjection sanz contredit. xm homes en prist et fames et enfanz, de ceus qui habitoient de ça et de là le rivage d’Albe[1] et les espandi en divers lieus parmi le roiaume de France. Li rois lor demanda se il voloient deguerpir la mescreantise de lor ydoles et recevoir la foi crestiane, et habiter entre François come i maismes poples et une maisme gent ; à ce s’acorderent volentiers.
Ensi fu cele guerre finée, qui lonc tens avoit duré,
- ↑ Albe, l’Elbe.
