Tournemine, messire Geffroy de Rosdranen[1], messire Chevin Biauboisel[2], le seigneur du Vauguion ; et si pristrent son filz, et moult d’autres barons et nobles hommes y furent mors et les autres pris ; mais il en tuerent plus qu’il n’en pristrent.
Si avint environ l’aube du jour, depuis que la bataille ot moult duré ; c’est assavoir la quarte partie de la nuit largement, et que par ycelle espace le duc se fust continuelment combatu, si sceut que ses barons et ses chevaliers estoient ou mors ou pris pour la greigneur partie en soy combatant, il se commença à retraire et se retraist jusques à la montaigne des mesiaux ; laquelle montaigne estoit bien loing de la place où la guerre avoit été commenciée, et avoit le dos vers le moulin à vent, et touz jours avoit aucuns qui le combatoient car il pensoient bien que c’estoit le duc. Si li demanderent s’il estoit le duc, et il leur respondi que non, car il cuidoit eschaper de leurs mains. Finablement il sceurent que c’estoit il ; si li demanderent qu’il se rendist, ausquiex il respondi que ja à Anglois il ne se rendroit, et qu’il avoit plus chier à souffrir mort, ja soit ce qu’il fust navré de vii plaies, dont aucunes estoient mortelles, si comme l’en disoit. Adonques vint i chevalier qui avoit à non monseigneur Bernart du Chastel, lequel dit au duc qu’il se rendist à lui, et le duc li demanda qui il estoit. Lors le chevalier li dist son nom, et le duc si se rendi à lui, et lors le menerent ou fort de la ville. Quant ceulz de sa gent qui estoient eschapez vifs sceurent que leur seigneur
