au roy auquel il avoit juré aide d’envoier en Flandres. Et ainssinc li roys, en grant compaignie et en belle, entra en Flandres ; et n’ala pas par le chemin que li autres roys avoient alé, mais par le lonc.
En cel temps, furent pluseurs traictierz de ceus de Gant et d’Ypre et de Brugez par devers le roy pour acort avoir, mais il ne porent du tout acorder ; mais nient pourquant Gant et Ypre se tindrent au roy, et y entrerent des genz du roy. En cel an, cilz de Cassel avoient fait i coc de toille et l’avoient mis sus le chastel, et estoit là escript :
Ce coc de toile chantera
Quant le roy trouvé ça sera.
Dont après ce que il orent esté aussi com assegié et enclos du roy, il pensserent comment il poussent le roy seurprendre, et envoierent pluseurs embassateurs qui firent entendre au roy que il se renderoient à sa volenté. Dont entrementez que l’en traictoit de ce et que les gens de pié orent paleté les uns aus autrez, en ce faissent nos genz retraitez en esperance d’aucun acort et que li roys estoit demourés en son pavillon a poy de gent et que il se voloit reposer com à remontée, cilz de Cassel rengié, dessendirent du chastel et entrerent par les tentes de l’ost en venant aus tentez du roy pour li prendre, jusques atant que serjans d’armes les congnurent et vinrent au roy dire que li anemis venoient et qu’il s’aprestast. Le roy lors apresté de cors et monté, ja soit ce que il n’eust pas tout son harnois de jambes, issi de sa tente, dont messires de Nouiers, l’oriflambe desploié, mena le roy par devers destre en encloant les Flammans. Dont li Flamanz, qui touz jours passoient devant eus, ne trouverent pas le roy ; mès il occirrent en leur venue i courtois chevalier c’on appeloit monseigneur Renau de Lor. Et ainssi li Flamans qui au roy faillirent, se rassemblerent en une
