rondiole et se combatirent longuement ; mais en la fin il furent partie des gens d’armes, et de ce qu’il furent partie et devisé, l’occizion fu si granz sus eux que poy en demoura qui ne feust là mort par les gens de cheval, car cil de pié i firent poi, et cil qui cuiderent fouir, rencontrerent le conte de Hainaut et sa bataille encontre eus, desquiex il furent occis tuit et mis à mort. Dont Diex, ainssinc si comme le roy meisme le dit, ot il ceste victore et fist plus que cil qui là estoient. Et fu le nombre des occiz xx mille ; et ce fu fait au jour de mardi, vigille de saint Berthelemy apostre.
Après ceste victore ainssinc faite, li roys, en la presence des barons, rendi la conté de Flandre franchement au conte, et li dit : « Contez, je sui ça venu avec mes barons que j’ai traveilliez pour vous et au mieuz, et à leur despens. Je vous rens vostre terre aquise et em pais. Or faites tant que justice i soit gardée et que par vostre deffaut il ne faille pas que plus i reviegne, quar se je i revenoie plus, ce seroit à mon profit et à vostre damage. » Et ainssinc, le conte reçut la conté du roy[1], qui ce fait s’entourna en France, et le conte de Flandres demoura et aucuns de cens qui au roy estoient, pour lui conforter.
En cel temps le conte enquist en Flandrez qui cens estoient qui avoient esté promoteurs et foteurs des mauvestiez qui esté avoient en Flandrez, et les prist soutilment et en fist justice ; et ainssinc mit à mort en mains de trois mois bien x mille.
En cel an, Guillaume Le Doien, qui avoit esté tout maistre et gouvreneur de la mauvaistié des Flamains, fu prins en Braibant par tel maniere. Quant il senti que li rois venoit en Flandres et que il ot eu victoire à Cassel, si s’en vint en Braibant par le conseil d’aucun de Flandrez, des groz, et dit au duc en tel maniere : « Sire, nostre conte nouz maine trop durement, et a mis à mort
- ↑ Ms. « jour ».
