pluseurs preudommes de Flandres par haine et sans cause ; dont s’il vouz plaisoit à nous aidier contre, nous vous soldoieriens à vostre voienté. » Et lors le duc li dist que il en averoit conseil. Dont l’endemain il li respondi que sa requeste il ne pooit faire sanz le conseil du roy de France, et que pour ce, il l’envoieroit à lui, et ce que il en voudroit faire, il s’en consentiroit. Lors cil, ainssi deceu en sa mauvestié fu envoiez à Paris au roy et mis en Chastelet. Et ses mauvestiez prouvées et congneuez, il fu tou[r]nés el pilori es halez, et les poinz ot copés, et l’endemain, comme près de mort, trainés et pendus au gibet de pierre, et ses poins delès lui.
En cel an, Loys de Biauviere, en perseverant en sa malice, vint à Roume, et par decepcions et cavillacions, fist tant que li Roumain le reciurent. Et leur dit que puisqu’il avoient requis le pape de venir à Roume, son propre siege, et il avoit esté hors par l’espace de xii ans ; que puizqu’il n’i voloit venir, il pooient eslire pape et gouvreneur de Roume, et que sus ce, previlege de consille general en avoient. Et lors, cilz de Roume, comme deceuz s’acorderent à lui, et prinrent i frere meneur cordelier qui nommez estoit frere Pierre de Carnelle, et le tindrent à pape et osbeïrent à lui adonc et pluseurs autres villes ; et ainssi fu en sainte Yglise scime et descorde par le mauvais conseil de cel Loys.
En cel an, furent lettres atachiez es portes Nostre Dame à Paris contenans vilenniez et diffaumes du pape Jehan. Et autres lettres aussinc y avoit closez ; lesquelez, par la deliberacion de l’evesque, avecquez l’Université, furent envoiez au pape ; et puis li papes les renvoia à l’evesque de Paris ; et furent toutez ces lettrez arses ou parvis Nostre Dame de par l’evesque, appelez les clergiez et les colleges et les processions des parrochez, et en presence de l’inquisiteur des bougrez, comme fausses et mauvaisez, et contenans herisie.
