sa court à Paris. Et fait ce, li roiz s’en tourna d’Amiens et vint en Engleterre, et li rois de France s’en vint à Biauvez.
En cel an, prist le duc de Bretaigne à fame la suer au conte de Savoie, à Chartres, le roy de France present qui fist leur noces ; et les espousa monseigneur Jehan Pasté, évesque de Chartrez en la maistre yglise de Nostre Dame, le mardi d’après la Saint Remy[1]. Et à celle journée entra ledit evesque prumierement à Chartrez[2], et fist aussinc li roys la feste.
En cel meisme temps, une damoiseille du conté d’Arras aporta à monseigneur Robert d’Artois unez lettres que l’en disoit que messires Thieris, evesque d’Arras, li avoit bailliez, es quellez, contenuz estoit que, après la mort du conte Robert d’Artois, se son filz Philippe moroit ainssois que li, que se il avoit hoir masle, que à lui appartendroit la conté d’Artois et non à sa suer Mahaut. Dont messires Robert monstra au roy icelles lettres et requist que sus ce feust enquesté, et que renunciacion qu’il eust fait el temps passé, quant tel cas apparoit, ne li devoit nuire. Dont li roys ot conseil à Chartres aus barons et aus prelas se sa requeste estoit juste ; et fu dit que se il estoit ainssinc de ces lettres com l’en disoit, que sa requeste devoit estre receue et que la contesse devoit estre appelée. Et ainssinc fu-il fait, quar la contesse fu seur ce ajournée à Paris à la Toussains devant le roy. Et pour ce que à celle journée de Toussains, li royz ne fu à Paris, elle fu continuée jusques aus octaves de la Saint Andrieu ensivant.
En cel temps, le conte de Savoe morut en sa maison dessus Gentilly ; et fu dit d’aucun que à cel temps il estoit esconmeniiés. Et en fu portés d’icelui liu en son pais sanz estre aportez à Paris.
