que le seigneur de Monpesat, comme triste, dolent, despit et courroucié de ce fait, appella en son aide le seneschal au roy d’Angleterre, et assaillirent a grant force de gent ycelle bastide, et firent tant qu’il entrerent dedenz par violence, et eulz entrez, touz ceulz qui estoient de la partie au roy de France mistrent à l’espée et pendirent des greigneurs et destruirent la bastide et acraventerent jusques à terre. Touz les biens qu’il trouverent pristrent et emporterent au chastel de Monpesat. Ce fait et ces choses venues à la cognoissance du roy, jasoit ce que par soy meismes, sanz requerir autre, il se peust bien estre vengié de l’injure et de la vilennie qui li avoit esté faite ; noientmoins, li voulant toutes ces choses faire par rayson, segnifia au roy d’Angleterre que l’injure qui li avoit esté faite en sa terre li fust amendée. Adonc, le roy d’Angleterre envoia en France Aymes[1], cousin germain au roy de France de par sa mere, avec noble chevalerie d’Angleterre et li donna pooir d’accorder, de traitier et de confermer tout entierement sus le fait de l’amende que le roy de France requeroit à avoir. Lors quant il furent venuz, le roy de France voult et requist pour l’amende que le seneschal et le sire de Montpesat avec aucuns autres qui avoient à ce fait esté et donné conseil à ce malefice et mauvais fait faire et perpetrer, li fussent bailliez, et avec ce le chastel de Montpesat rendu. Les Anglois oyrent la requeste du roy, et quant il virent que le courage du roy ne se vouloit à autre amende flechir ne accorder, si se consentirent faintement à la volenté du roy. Et comme il s’en vousissent retourner en Gascoigne, il envoia avec eulz i de ses
- ↑ « Aymes » est Edmond, comte de Kent, frère d’Édouard II.
