| ◄ Laisse CCCCLXXXIV | Laisse CCCCLXXXV | Laisse CCCCLXXXVI ► |
— N’i aler, frere », dist Riçars li Normant.
— Si ferai certes », dist il ireemant.
Le destrer broce, sa haste paumoiant,
Au treif le rois s’an vient isnellemant,
Desist a tere, anc ne requist sarçant,
En tere afice son roit esplié pongant,
L’escuz li pent el flans de l’auferant,
Deslace soi le verd elme luisant,
El paveilons s’en entre maintenant,
Voit les barons entor le roi taisant ;
E l’enperere de grant ire esprant,
Dos guainz de maille veit forment manoiant.
Li quens le garde, si feit chiere riant,
Devant ses piez en jenoillons s’estant,
Salüez l’a dou Piere roiamant,
De sa vitorie le voloit feir presant ;
Mais l’enperere n’i leit dir plus avant,
Ançois li dist : « Dan culvers mescreant,
« Avez nos vos encor trovez vivant,
« Qe v’en fuïstes de l’estor solemant
« Por quoi morisent e moi el remanant.
« Par vestre orguel, qe demenez si grant,
« N’a estez manchise qe moi e ceste gent
« Ne somes mors, j’en sui bien conoissant.
« Mais segond l’euvre en avroiz loemant :
« Ferai vos pandre, par le cor sant Amant. »
A cestui mot a levez le un guant ;
Ferir en veult li quens par mié le dant,
Quant por le nés le consuet tot avant :
Le sang en raie, q’en rogist l’açerant.
Le rois escrie : « Trenciez cist seduant. »
Mal dehaiz nus q’en feisisent senblant !
Se Rollant fu irez je ne demant ;
En piez saili e mist la man au brant,
Le roi ferist, quant il fui remembrant
Qe il l’avoit noriz petit enfant.
Del treif s’en ist honteus et sospirant,
El destrer monte, l’escu et l’aste prant,
Les laces ferme de son heume luisant,
Ensi des host belement galopant.
Quant fu defors, si s’an veit speronant :
En stragne guise veult fer son vengemant.
Honte le maine et hiror si tres grant
Ne lui remambre d’ami ne de parant ;
Anz q’il retort, par le mien esciant,
De lui veoir seront plus desirant
François et Carles qe mer de son enfant.