| ◄ Laisse CCCCXXXIX | Laisse CCCCXL | Laisse CCCCXLI ► |
Quant verent Saracins por Ogier d’Alemaigne
Hecubar mort cheïr et trabuchier l’ensaigne,
Ansi s’esbaïrent com renart qe l’an pragne.
Dardanus si leit core un noir destrer d’Espaigne
Qe fiert des piez derier e par devant regaigne,
Et a feit une jostre sor Gaifer de Toraigne :
Par mié le gros dou cuer le fer el fust li baigne,
Dou cheval l’abat mort, n’oit soigne qi s’en plaigne ;
Pués mist man a l’espee, qe bien li estoit compaigne,
Car bone estoit l’espee et ardiç li cataigne ;
Veit ferir Arcembaut, li quens de Moriaigne,
Dou cheval l’abati, mais ne l’oncist nel saigne.
Olivier vient, isnel com livrer por campaigne,
E coisi Dardanus qe nos François magagne,
Par mié l’escuz le fiert, n’est si dur qe nel fraigne ;
Ne li vaut son obers un dras gris de montaigne,
El cuert li mist sa lance, mort l’abat senz enfaigne.
Pués a trete la spee ; un tot seul n’en sparaigne ;
Cui il en fiert un colp, greu est s’il ne s’en saigne ;
Plus de quatre en fendi enfraciqu’en l’entraigne.
De trestoz cels barons, ce est couse certaigne,
N’i fu meudres de lui fors le niés Carlemaigne.