◄ Laisse DXXXIX | Laisse DXL | Laisse DXLI ► |
Droit vers son oncle torne son Araby.
Un escüer son escu li baily :
Li borcle fu d’un cristal esclari ;
Par desoz l’eur e desor un tapy
Une pulcelle soz un abre flori
I avoit asisse dejoste son ami.
Li ergolos Pelias le sesi,
Par mé la guige a son col le pendi.
Le roy, son oncle, li baille un esply
A uns penonçaus che onques plus bel non vi,
D’or et argent en quart part establi :
Une roïne en son regne le fi,
De Femenie Pelias le tramy ;
Soror estoit dou roy Tuaparly.
Cil le prend, cui tot le sang orgully,
Si le paumoie a pué ne le croisi.
Dist a son oncle : « Ne soiez esbaï ;
« Jamés ne fui recreanz ni houni.
« Mont par seroit Mahomet afoibli
« Se je perdroie vers un teil com a ci. »
Or chanterons dou franc qens seignori
Comant ou trief l’amirant se garni.