◄ Laisse DXLIV | Laisse DXLV | Laisse DXLVI ► |
Or sunt armei cels chevalers de pris.
Le duc Rolant seoit sor l’Arabis :
Jameis ne l’oit meilor, for Velaintis.
In feir son tour s’est ariere guenchis.
Dionés, la belle plus qe rose ne lis,
Li apresante un fort eschu bronis :
Tut anviron fu alistei d’orfris,
De buons safirs luisans com fou apris ;
Le son leucher fu d’olifant treitis ;
Le cuer fu fort, non mie de berbis,
Mais d’un viel cers qi in chace fu pris ;
Grant oit la borcle d’un cristal esclaris :
Mahon i avoit, sor un trecel asis,
Con il prediche le pueple a son escris.
Par mi la guinche le a le duch seisis,
Garde l’imaje, s’an gita un bais ris,
Un mot a dit planemant, en secris :
« Por qoi ci n’estes, Hestou, biaus dus amis,
« Aveqe vous Oliver le marchis,
« E ne fusés coneüs ni reqis ?
« Car huei avroie un jor de Paradis. »
Soldan regarde, de un espié l’enqis ;
Sa belle file li an baile un pointis,
Hante d’aiol e penuns de samis.
Le duc le prant, de bien feir talentis,
E pués s’eleise aval lo pré floris ;
Desoz le breit le bon destrier de pris.
Soldan monta sor un mulet petis,
Un baston tient entaillei e poulis,
Feit rue feir e debeiser le cris.
Un espion, que de Diex soit maudis !
(Blacus oit non, frere Hestormaris,
De maint lengajes estoit celui apris)
Cil a le roi Soldan a raisons mis.
« Dan roi », feit il, « maintes fois m’ais reqis
« De le façon Rolant, qant m’ais tramis
« En Alamaigne et an Françe, a Paris ;
« Vens or veoir Rolant le segnoris.
— Voir », feit le roi, « mout an sui talentis ;
« Monstre le moi, se tu sois beneïs.
— Sire », dist il, « par les eul de mon vis,
« Jet direi voir, mais j’en serai haïs,
« Car mout me samble q’il soit feit ton amis,
« Chant por ta fille s’est de joste entramis.
« Coneüz l’ai a le front desgarnys ;
« Je le vi ja al tors de Saint Dounys
« Par une orfre cunbatre au brant forbis ;
« Voiant mes oil, la bataille chunqys.
« Garde de menbres comant en est fornys. »
Soldans respont : « Adonc m’ais escharnis,
« Chant ja m’ais dit, et autres plus de dis,
« Que Rolant passe de sciance Davis :
« Bien avroit fait cun fous et asoutis
« Chant ansi soul venist en ces paÿs. »
Dist le Païns : « Ce m’a bien entreprys ;
« Rolant est saige, amés et encherys,
« Et non cevauche, ensi cun je ay oÿs,
« Sens vint mil homes a civals bien asis.
« Mais de faiture, de voirs le vos plevys,
« Le niés Karlons de cestui non devis. »
Respont Sanson : « Tu non sois que tu dis ;
« Tes piers ont ja maint preudome ontis.
« Jentils sir peres, non soieiz esbaïs :
« Se fust Diable que aidier nos venis,
« Si seruns nos tenuz al suen servis. »