Voyant par les soudars ma maison saccagee

Auteur: Pierre de Ronsard (1524-1585)

Recueil : Amours Diverses

Voyant par les soudars ma maison saccagee,
Et tout mon pays estre image de la mort,
Pensant en ta beauté, tu estois mon support,
Et soudain ma tristesse en joye estoit changee.

Resolu je disois, Fortune s'est vangee,
Elle emporte mon bien, et non mon reconfort.
Hà, que je suis trompé! tu me fais plus de tort
Que n'eust fait une armee en bataille rangee.

Les soudars m'ont pillé, tu as ravy mon cœur:
Tu es plus grand voleur, j'en demande justice:
Tu es plus digne qu'eux de cruelle rigueur.

Tu saccages ma vie en te faisant service:
Encores te mocquant tu braves ma langueur,
Qui me fait plus de mal, que ne fait ta malice.