Le Livre des ballades/Priez pour paix, le vray tresor de joye
Priez pour paix, doulce Vierge Marie,
Royne des cieulx, & du monde maiſtreſſe,
Faictes prier par voſtre courtoiſie,
Saincts & ſainctes, & prenez voſtre adreſſe
Vers voſtre fils, requerrant ſa haulteſſe
Qu’il lui plaiſe ſon peuple regarder,
Que de ſon ſang a voulu rachieter,
En déboutant guerre qui tout deſvoye ;
De prières ne vouj veuillez laſſer,
Priez pour paix, le vray treſor de joye.
Priez prelaz & gens de ſaincte vie,
Religieux, ne dormez en pareſſe.
Priez, maiſtres, & tous ſuivans clergie,
Car par guerre fault que l’eſtude ceſſe ;
Mouſtiers deſtruiz ſont ſans qu’on les redreſſe,
Le ſervice de Dieu vous fault laiſſer,
Quand ne povez en repos demourer ;
Priez ſi fort que briefment Dieu vous oye,
L’Egliſe voult à ce vous ordonner,
Priez pour paix, le vray treſor de joye.
Priez, princes qui avez ſeigneurie,
Roys, ducs, contes, barons plains de nobleſſe ;
Gentils hommes avec chevalerie,
Car meſchans gens ſurmontent gentilleſſe ;
En leurs mains ont toute voſtre richeſſe,
Desbatz les font en hault eſtat monter,
Vous le povez chaſcun jour veoir au cler,
Et ſon riches de vos biens & monnoye,
Dont vous deuſſiez le peuple ſupporter ;
Priez pour paix, lte vray treſor de joye.
Priez, peuple qui fouffrez tirannie,
Car vos ſeigneurs ſont en telle foibleſſe,
Qu’ilz ne peuvent vous garder par maiſtrie,
Ne vous aider en voſtre grant deſtreſſe ;
Loyaux marchans, la ſelle ſi vous bleſſe,
Fort ſur le doz chaſcun vous vient preſſer,
Et ne povez marchandiſe mener,
Car vous n’avez ſeur paſſage, ne voye,
En maint péril vous convient-il paſſer ;
Priez pour paix, le vray treſor de joye.
Priez, galans joyeulx en compaignie.
Qui deſpendre deſirez à largeſſe,
Guerre vous tient la bourſe dégarnie,
Priez, amans, qui voulez en lieſſe
Servir amours, car guerre, par rudeſſe,
Vous deſourbe de voz dames hanter,
Qui mainteſfois fait leurs voloirs torner,
Et quant tenez le bout de la courroye,
Ung eſtrangier ſi le vous vient oſter ;
Priez pour paix, le vray treſor de joye.
Dieu tout puiſſant nous vueille conforter
Toutes choſes en terre, ciel & mer,
Priez vers lui que brief en tout pourvoye,
En luy ſeul eſt de tous maulx amender ;
Priez pour paix, le vray treſor de joye.