Les Œuvres de François Rabelais (Éditions Marty-Laveaux)/LeQuartLivre/58

François Rabelais

Les Œuvres de François Rabelais (Éditions Marty-Laveaux) (1552)

Alphonse Lemerre, 1870 (Tome II, p. 473-475).

Comment en la court du maiſtre ingenieux
Pantagruel deteſta les Engaſtrimythes^{[BD 1]}
& les Gaſtrolatres.

Chapitre LVIII.

En la court de ce grand maiſtre Ingenieux Pantagruel apperceut deux manieres de gens appariteurs importuns & par trop officieux, les quelz il eut en grande abhomination. Les vns eſtoient nommez Engaſtrimythes ſoy diſoient eſtre deſcenduz de l’antique race de Eurycles, & ſur ce alleguoient le teſmoignage de Ariſtophanes en la comedie intitulee les Tahons, ou mouſches gueſpes^[1]. Dont anciennement eſtoient dictz Eurycliens, comme eſcript Plato^[2], & Plutarcle on liure de la ceſſation des Oracles^[3]. Es ſainctz Decretz 26. queſt. 3. ſont appellez Ventriloques : & ainſi les nomme en langue Ionicque Hippocrates lib. 5. Epid. comme parlans de ventre. Sophocles les appelle Stenomantes^{[BD 2][4]}. C’eſtoient diuinateurs, enchanteurs, & abuſeurs du ſimple peuple, ſemblans non de la bouche, mais du ventre parler & reſpondre à ceulx qui les interrogeoient.

Telle eſtoit enuiron l’an de noſtre benoiſt Seruateur 1513. Iacobe Rodogine^[5] Italiane femme de baſſe maiſon. Du ventre de laquelle nous auons ſouuent ouy, auſſi ont aultres infiniz en Ferrare & ailleurs la voix de l’eſprit immonde, certainement baſſe, foible, & petite : toutesfoys bien articulee, diſtincte, & intelligible, lors que par la curioſité des riches ſeigneurs & princes de la Guaulle Ciſalpine^{[BD 3]} elle eſtoit appellee & mandee. Les quelz pour houſter tout doubte de fiction & fraude occulte, la faiſoient deſpouiller toute nue, & luy faiſoient clourre la bouche & le nez. Ceſtuy maling eſprit ſe faiſoit nommer Creſpelu, ou Cincinnatule : & ſembloit prendre plaiſir ainſi eſtant appelé. Quand ainſi on l’appelloit, ſoubdain aux propous reſpondoit. Si on l’interrogeoit des cas præſens ou paſſez, il en reſpondoit pertinement, iuſques à tirer les auditeurs en admiration. Si des choſes futures : touſiours mentoit, iamais n’en diſoit la verité. Et ſouuent ſembloit confeſſer ſon ignorance, en lieu de y reſpondre faiſant vn gros pet, ou marmonnant quelques motz non intelligibles, & de barbare termination.

Les Gaſtrolatres d’vn aultre couſté ſe tenoient ſerrez par trouppes & par bandes, ioyeulx, mignars, douilletz aulcuns : aultres triſtes, graues, ſeueres, rechignez : tous ocieux, rien ne faiſans, poinct ne trauaillans, poys & charge inutile de la Terre, comme dict Heſiode^[6] : craignans (ſcelon qu’on pouoit iuger) le Ventre offenſer, & emmaigrir. Au reſte masquez, deſguiſez, & veſtuz tant eſtrangement, que c’eſtoit belle choſe. Vous dictez, & eſt eſcript par pluſieurs ſaiges & antiques Philoſophes, que l’induſtrie de Nature appert merueilleuſe en l’eſbatement qu’elle ſemble auoir prins formant les Coquilles de mer : tant y veoyd on de varieté, tant de figures, tant de couleurs, tant de traictz & formes non imitables par art. Ie vous aſceure qu’en la veſture de cas Gaſtrolatres Coquillons ne veiſmes moins de diuerſité & deſguiſement. Ilz tous tenoient Gaſter pour leur grand Dieu : le adoroient comme Dieu : luy ſacrifioient comme à leur Dieu omnipotens : ne recongnoiſſoient aultre Dieu que luy : le ſeruoient, aymoient ſus toutes choſes, honoroient comme leur Dieu. Vous euſſiez dict que proprement d’eulx auoit le ſainct Enuoyé^[7] eſcript. Philippens. 3. Pluſieurs ſont des quelz ſouuent ie vous ay parlé (encores præſentement ie le vous diz les larmes à l’œil) ennnemis de la croix du Chriſt : des quelz Mort ſera la conſommation : des quelz Ventre eſt le Dieu. Pantagruel les comparoit au Cyclope Polyphemus : lequel Euripides faict parler comme s’enſuyt. Ie ne ſacrifie que à moy (aux Dieux poinct) & à ceſtuy mon Ventre le plus grand de tous les Dieux^[8].

---

1. Engaſtrimythes. parlans du ventre. Gaſtrolatres. adorateurs du ventre
2. Sternomantes. diuinans par la poiſtrine
3. Gaulle Ciſalpine. partie ancienne de Gaule entre les mons Cenis & le fleuue Rubicon pres Rimano, comprenente Piedmont, Montferrat, Aſtiſane, Vercelloys, Millan, Mantoue, Ferrare, &c.

1. Les Tahons, ou mouſches gueſpes. Voyez ce qu’Aristophane y dit (v. 1019) du ventriloque athénien Euryclès, et les éclaircissements que son scholiaste ajoute à ce passage.
2. Plato. — Le Sophiste, XXXVII.
3. De la ceſſation des Oracles. — XVI.
4. Sternomantes. Voyez Pollux II, 262.
5. Iacobe Rodogine. Toute cette histoire est tirée des Antlquæ lectiones (VIII, 10) de Cœlius Rhodiginus, originaire de Rovigo, comme la ventriloque dont il parle ; c’est lui qui a fourni à Rabelais la plupart des témoignages mentionnés au commencement de ce chapitre. Voyez t. II, p. 125.
6. Comme dict Heſiode. Ce n’est pas Hésiode qui dit cela, mais Homère :

   … ἐτὡσιον ἄχθος ὰρούρης.

   (Iliade, XVIII, 104)
7. Le ſainct Enuoyé. S. Paul, Épître aux Philippiens, III, 18 et 19.
8. Ie ne ſacrifie… de tous les Dieux.

   … Οὕτινι θύω, πλὴν ὲμοί, θεἴσι δ’ὄυ
   ϰαί τῇ μεγίστῃ γαστρἰ τῇδε δαιμονων (v. 334)