Venus est ou palais, ou il ot moult de gent,
Ou Millez de Hongrie faisoit assamblement
Pour la bielle affiier, la ou li syens coers tent.
La furent maint baron et maint prince exellent
Et maint hault sinatour de grant estorement.
Puis ne demoura ghaires, che sachiés vraiement,
Quant uns cardinaus vint ylloecques noblement ;
Grant fieste li ont fait trestous conmunement.
Et li frans cardinaus parla moult simplement
Et a dit as barons avironneement :
« Signeurs, li apostoles, que Dieus gart de tourment,
M’envoie chi a vous asséz hasteement
Pour dire une besoingne qu’il scet bien vraiement
Et que je vous diray chi endroit en prezent,
Que ja ne le laray pour Millon au corps gent,
Que je voy la endroit en grant variement. »
Gh’a dit li cardiniaus, qui scet moult de clergie :
« Signeur baron », dist il, « je vous achiertefie :
Li apostolle à une nouvielle oÿe
Que vous voléz donner a Millon de Hongrie
Flourence la puchielle et toutte Ronmenie.
L’apostolle vous mande que vous nel fachiés mie,
Car il scet tout de vray qu’Esmerés est en vie ;
Droit en l’ost tient prison, ensi le chiertefie,
Si que vous li feréz trop grande villonnie,
S’enssement li tolliés et sa tiere et s’amie.
Et gardéz que vous faittes, pour Dieu je vous em prie,
Car sachiés que li pappes tous cheux escumenie
Qui seront a Millon ne plus de se partie. »
Et quant Millez l’oÿ, ne li agrea mie ;
Dou cardinal s’aproche, s’a se robe sacquie
Et li a dit : « Damps clers, li corps Dieu vous maudie !
- ↑ 2070 Qui feront — 2073 vo maudie.
2052 S. dist — 2054 qui scet
