Dittez vous que j’ay fait traÿson et boydie
Viers mon frere Esmeret, qui ot chiere hardie ? »
Et dist li cardinaux : « Par Dieu, le fil Marie,
Tu le scés mieux de moy seloncq mon estudie,
Mais tu ne cachez pas moult grande courtoisie
A ton frere giermain. Que voels tu que je die ?
Je vois a ta coullour, qui est toutte rougie,
Que tu n’as mie droit tant qu’em ceste pannie. »
Quant Milles entendi le cardinal parler,
Il a trait un couttiel, bien le cuida frapper,
Mais adevant li vont et li comte et li per
Et puis vont a Millon le sien couttiel hoster
Et puis furent d’acort de lui emprysonner ;
Par dedens unne tour ont fait Millon mener.
Quant la bielle l’oÿ, Dieu em prist a loer
Et prie Jhesucris, qui fist et chiel et mer,
Qu’Esmeréz, son amy, li voeille ramener ;
Et Milles fu dolans, en li n’ot qu’aïrer.
L’endemain au matin, si que sus le disner,
Vint un Ronmain prisons qui volt en Ronme entrer,
Qu’Esmeréz envoyoit les barons saluer
Et la bielle Flourenche, s’amie, conforter.
A la porte est venus, si a pris a criier :
« Signeur, laissiés moy ens, ne vous devés doubter !
Je vous vieng d’Esmeret nouvielles aportér. »
Quant li Ronmain l’oÿrent, dont li vont deffremer
Le porte vistement et le laissent entrer ;
Va ou palais maiour, si a pris a monter.
En parlement estoient maint baron noble et ber,
Pour Millon furent pris ylluecques a parler :
Li aucun le voloient de prison delivrer,
Et li aultre voloient c’on le laissast ester.
- ↑ 2098 de desm. — 2101 Vont.
2074 bourderie — 2077 Tu les