Adont vint li Messagez les barons saluer :
« Signeurs », dist li messagez, « voeilliés moy escoutter :
Esmeréz vous salue, qui tant fait a loer ;
Il est ou tref Garssille, qui tant fait a doubter.
Sans buies et sans fiers poelt bien en l’ost aller,
Mais par son sairement il ne poelt retourner
Sans le congiet dou roy, qui le fait honnourer,
Pour ce que bien congnut, ch’ay oÿ deviser,
Le pere a Esmeré, qui tant fist a amer :
Jadis fist roy Gharssille des paiiens delivrer ;
Si qu’il en fist le fil moult grant honnour porter
Et li prie souvent qu’il se voeille adonner
D’iestre ses saudoiiers pour sa gherre aquiever.
Mais Esmerés ne volt ceste chose acorder,
Bien li oÿ au roy fianchier et jurer
Que point ne le feroit pour le thieste couper.
Ou est Millez, ses freres ? A lui me fault parler,
Car ses frerez m’a fait un message livrer
Qu’il me fault a Millon et dire et recorder, »
Dont le vont li baron de prison delivrer.
A Flourence le vont dire sans arriester,
Et dist uns chevaliers qu’a lui ala parler :
« Dame, vous devéz bien Nostre Signeur loer,
Car vescha ung message, che sachiés sans doubter,
Qui d’Esmeret revient nouvielles aporter. »
Dont conmencha la bielle de joie à souspirer.
Moult lie fu Flourenche, la puchielle senee ;
Et li gentil Ronmain n’y ont fait arriestee,
Millon font amener en la salle pavée,
Puis dist li messagiers a moult haulte alenee :
- ↑ 2132 fu et Flourenche sont intervertis — 2135 messagez.
2112 se f. — 2115 J. fils — 2121 thiester acopper — 2124 Qui me — 2125 Adont vont — 2129 messagier — 2131 Adont
