Qu’au jour d’uy m’avéz fait. Ce fu par me langage,
Car volentiers fezisse au cardinal damaige,
Se n’eüssiés esté par le vostre barnage. »
A tant es vous Flourence, le courtoise et le sage !
Et quant Milles le vit, se n’y fist arestage,
Esrant li ahierdi son bliaut de Cartage,
Se li pria mierchi, voiant tout le barnage.
« Dame », dist il a lui, « entendés mon corage !
Par ycelui Signeur qui pour humain linage
Rechupt mort en la crois a si tresgrant hontaige,
Cuiday ge qu’Esmeréz, dont mon coër s’assouuage,
Fust et mors et peris ou grant estour sauvage,
Et pour chou requerroie vo corps a mariage ;
Car de vous ne volroie avoir le puchelage.
Ne vo corps admenrir pour tout vostre hiretage. »
« Dame », che dist Millon, li traïttres prouvéz,
« Mes frerez n’est pas mors, Dieus en soit aouréz !
Se riens vous ay meffait, se le me pardonnéz,
Et je l’amenderay, enssi que vous volréz.
— Mille », che dist Flourenche, dont li cors fu moléz,
« Et je le vous pardonne, telle est ma volentéz !
Ja par moy nel sara vos frerez Esmeréz. »
Adont s’est li traÿttrez tellement racordéz
Que trestous li barnagez s’est a lui affiiés,
Et tiennent parlement, affin que raccattéz
Fust li biaus Esmeréz, qui estoit pris as trez.
« Biaus signeur », che dist Milles, « se croire me voléz,
Ja n’isterons la hors, ce n’est mie mes grez,
Tant qu’Esmeréz sera par decha retournés,
Car ja me doubteroie, par Dieu qui fu penéz,
Se nous les assalons, que il n’en fust grevéz. »
- ↑ 2182 Mais — 2183 v. ait.
2166 Que au — 2168 Se vous — 2176 ge manque — 2177 perils — 2178 requerroige vos — 2180 Ne de vos c.
