Quant le sien sairement ne voelt mie brisier.
Li rois le tint huit jours ylloecq en son dangier,
Pour ce qu’il le cuida tous jours amoliier,
Mais estoit pour noyent, ains ne le vit cambgier ;
Asséz li pronmettoit et argent et or mier,
Moult li faisoit li rois siervir et aaisier,
Et pour l’amour de lui maint aultre chevalier,
Honme au ber Esmeret et si maistre escuiier.
Gharssilles les assist un jour a son mengier,
Noblement fist siervir Esmeré le princhier,
Et apriès le disner le prist a arrainnier :
« Esmeré », dist li rois, « je ne vous puis ploiier
Que voeilliés vous a moy yestre pour nul denier ?
— Sire », dist Esmeréz, « par Dieu le droitturier,
Vous avés bien pooir de mon corps essillier,
Mais, s’on me devoit ja le thieste detrenchier,
N’aroie point le coer de Ronmains renoiier
Ne de grever Flourence ne de lui gheroiier.
Ma foy li creantay de s’onneur essauchier ;
Or me seroit tourné a villain reprochier,
Se j’avoie menti celle noble mouillier.
Mais d’une chose est drois que vous doie priier :
Je vous ay tant oÿ le mien pere prisier
Et loer de son corps et qu’il vous volt aydier
Et vo tiere sauver et getter d’encombrier,
Si vous pri qu’a son fil en rendéz le loiïer. »
Quant Gharssillez l’oÿ, se li dist sans songier :
« Esmeréz, biaus amis, a celer ne vous quier :
Raler vous en lairay tout a vo desirier,
Mais de tant vous di bien que vous avéz mestier :
Que ja mais par decha ne soyés prisonnier
Ne sur ma courtoisie de riens a enfiier,
Car, se ja mais venéz contre moy capploiier
2225 serment — 2226 yloecques — 2227 quile cuida — 2239 de moy e, — 2247 Jeay tant vous — 2248 vous vous aydier.
