Entrons dedens la ville, trop alons detriant ;
Milles est retournéz, par le mien enssiant. »
Lors brocha Esmeréz le diestrier aufreant,
Et tout li hault baron le vont au dos sieuwant ;
Moult li portent honneur li prince combattant.
Il est entrés en Ronme dou tout a son conmand ;
On li va devant li la verde hierbe gettant.
A ces pheniestres sont chevalier et siergant
Et bourgois et bourgoisez et li petit enffant ;
Liet sont de sa venue li petit et li grant,
Et les sainz de le ville vont conttre lui portant.
À tant es l’apostolle qui le va benissant,
Et li bers Esmeréz le va biel saluant.
« Sains peres », dist li enffez, « a vous je me conmand,
Car vous tenéz le lieu de Dieu le tout poissant. »
Ou hault palais maiour Esmeréz descendi,
Fourment s’esmiervilla, quant Mille ne choizi
Et Flourence, s’amie, que son corps amoit sy.
Il a dit a se gent : « Biaus signeurs, qu’esse chy ?
Chil qui huy me deüssent mieux avoir conjoÿ,
Che sont chil qu’au jour d’uy je ne vy ne oÿ ;
J’en ay le corps et coer fourment tristre et mary.
C’est pour Millon, mon frere, signeur, que je le dy,
Et sachiés bien que c’est pour Flourence aultresy. »
Lors keurent viers sa cambre maint chevalier hardy,
Mais n’y ot damoizielle qui n’ait dit sans detry
Qu’ains puis ne repaira que elle s’en parti.
Adont a Esmeret sont arriere verty.
« Aÿ ! sire », font il, « par Dieu qui ne menty,
Pierdue est vo mouillier au gent corps signoury
- ↑ 2529 deusse — 2531 ay fourment le corps et coer tristre fourment m. — 2533 oultre sy — 2534 deuiers.
2518 Et manque — 2520 li saint
