Et tant que vinrent Guillames Bertrans. (*)
Kalles ot feme d’un parenté moult grant,
Fille à un roi d’une cité puissant,
Costantinoble, si l’apele la gent.
La dame ot nom Blancheflor, au cors gent,
Léal et boine et de grant esciant.
Or escoutés la fin cestui roman ;
Dex vos garisse et li ber sains Jehans !
Grant cort tint Kalles l’emperere Francor (*)
Droit à Paris, en son palais maior.
Illec estoient maint fil de vavasor,
Maint duc i furent, maint prince et maint contor,
Et li dus Naimes, ses boins conseléor. (*)
Onques el siecle n’en vit nus hom meillor
Ne qui de foi tant amast son segnor,
Ne tant por lui soffrist peine et dolor. (*)
Sor tos les autres avoit cil la valor, (*)
Si que de Dieu il en ot grant restor,
De Dieu de glore, l’umainne criator. (*)
Quatre fis ot de sa gentil oissor,
Qui des pers furent et hardi jostéor.
En Ronscivals mort furent à dolor,
