Que la garist de si très fier torment
Com d’estre vive getée en feu ardent.
Li rois méismes estoit d’ele dolens,
Que il l’aimoit de fi et tenrement ;
Mais tant dotoit le blasme de la gent
De l’espargnier ne pot faire noient
Qu’ele ne muere à duel et à torment.
Et cil Macaires, o lui tuit si parent,
Sempres estoit encontre ele atendant
De la conduire et metre el feu ardent.
Le roi conseille mainte fois et sovent
Que d’ele tost face le jugement :
« Et se nel fetes, sachiés à escient
« Blasme en aurés entre tote la gent ;
« Petit et grant vos tenront por noient. »
Quant ot li rois entendu les barons,
Desore tos les parens Ganelon,
Vers la roïne que furent tant embronc (*)
Que de l’ocire sans point de raençon,(*)
Des iex la plore o le bon duc Naimon.
Quant l’emperere a véu la tenson
Que as uns plaist, n’est mie as autres bon, (*)
De la roïne jugier fist mencion.
