assis dans sa chaire, me fit mettre a genoux et prester le serment, puis me mit le baston a la main en suitte, de quoy je luy en fis les tres humbles remerciemens dont je me peus aviser. Tous ceux quy estoint presens me vindrent embrasser et se conjouir de ma promotion ; et en suitte tous les corps de l’armée, tant d’infanterie que de cavalerie, vindrent rendre tres humbles graces au roy du choix qu’il avoit fait de ma personne, leur premier mareschal de camp, pour le faire mareschal de France : et ceux de l'artiglerie luy ayant demandé permission de faire, le soir mesme, un salve de tous les canons quy estoint en l’armée, l’infanterie en fit de mesme pour faire un salve de resjouissance ; et comme il se faisoit[1], le sieur de Calonges[2] gouverneur de Montpelier ayant fait demander a la tranchée pourquoy ce salve se faisoit, et luy en ayant esté dit la cause, m’envoya mander que ceux de Montpelier ne feroint pas moins que ceux de l’armée, et y fit faire aussy un salve general.
Aussy ce mesme soir ils envoyerent au roy l’entiere resolution de la paix ; et trois jours auparavant nous en avions telle asseurance que l’on n’avançoit rien a nos travaux.
Le jeudy 13me Mr de Rohan sortit de Montpelier pour aller porter leur volonté aux desputés assemblés a Ganges[3] pour la resolution de la paix, ou il y avoit
- ↑ Il y avait aux précédentes éditions : et comme ceux de la ville se fâchoient.
- ↑ N. Reverend de Bougy, seigneur de Calonges, gentilhomme du Condomois, allié du duc de Rohan, qui lui avait donné le commandement dans Montpellier.
- ↑ Ganges, chef-lieu de canton de l’arrondissement de Montpellier, sur la rive gauche de l'Hérault.
