Nous vinmes coucher a Domene[1], et le lendemain dimanche 28me nous vinmes a Grenoble souper cheux Mr de Crequy. Nous y trouvasmes le garde des sceaux que l’on avoit fait venir a Grenoble pour le retirer de Lion d’aupres de la reine[2] qu’il estoit soubçonné d’animer contre monsieur le cardinal, et l’on en voyoit apertement la mauvaise intelligence fomentée par Mr de Bellegarde quy s’estoit desclaré ennemy de monsieur le cardinal pour avoir fait donner la lieutenance de roy de Bourgongne, vacante par la mort du marquis de Mirebeau, a Tavannes qu’il n’aymoit pas. D'autre costé Mr de Guyse a quy monsieur le cardinal vouloit oster l’amirauté de Levant, pretendant qu’elle estoit dependante de celle de Ponant, ne s’oublioit pas a luy rendre les mauvais offices qu’il pouvoit, et d’autant plus maintenant que leurs affaires estoint au pis parce que monsieur le cardinal avoit envoyé un huissier en Provence y faire quelque acte a la marine, et Mr de Guyse l'avoit oultragé et en suitte mis prisonnier. Madame de Combalet aussy, que la reine n’affectionnoit pas, aydoit bien a accroistre l’aigreur de la reine quy se plaignoit qu’elle entretenoit a son service quarante gentilshommes lesquels ne la voyoint point et ne bougeoint d’aupres de monsieur le cardinal ; lequel de son costé avoit a se plaindre de ce que, pendant qu’il estoit occupé aux affaires de l’estat et a l’agrandissement d’iceluy, on machinoit sa ruine en animant la reine mere contre luy ; que deux hommes qu’il avoit eslevés
