mencement du mois de fevrier, ce qu’il executa le.....[1], ayant premierement esté trouver monsieur le cardinal en son logis et luy ayant dit qu’il renonçoit a son amitié.
Fevrier. — J'estois cheux le president de Chevry quand j'en sceus la nouvelle, et m'en allay a l'heure mesme trouver monsieur le cardinal et sçavoir ce que j'avois a faire (comme au premier ministre, en l’absence du roy). Il me dit que le roy seroit le soir mesme a Paris, et qu'il avoit envoyé au gallop Mr Bouteillier, tant pour l’avertir du partement de Monsieur, que pour le conseiller de venir a Paris.
Il vint descendre cheux monsieur le cardinal, ou tout le monde se trouva, et de là il alla cheux la reine mere. Il me fit mettre dans son carrosse : il me donna un sanglier qu’il avoit pris le jour mesme, et me fit tres bonne chere. Il me dit en allant au Louvre qu’il alloit quereller la reine sa mere d’avoir fait partir de la court monsieur son frere. Je luy dis qu’elle seroit blamable sy elle l’avoit fait, et que je m’estonnois fort qu’elle luy eut conseillé telle chose. Il me respondit : « Sy a asseurement, pour la haine qu’elle porte a monsieur le cardinal. » Sur cela il entra cheux la reine sa mere quy avoit ce jour là pris quelque medecine.
Peu de jours apres le roy se resolut d'aller passer son caresme prenant a Compiegne, et les reines l’y voulurent suyvre. La veille qu’il partit pour y aller il
- ↑ Le 1er février, suivant Levassor : mais le cardinal de Richelieu dans ses mémoires, et Vittorio Siri dans les Memorie recondite, donnent au départ du duc d'Orléans la date du 30 janvier.
