verification : et durant le temps qu’il fallut mettre a changer cela, le nonce ayant eu advis de cette affaire vint trouver monsieur le cardinal le mesme jour qu’il festinoit Jean de Vert et Equenfort que le roy apres les avoir tirés des mains du duc de Weimarch, et mis prisonniers au bois de Vincennes[1], finalement ce jour là les avoit mis sur leur foy, et monsieur le cardinal leur voulut faire festin, ou Monsieur se trouva[2]. Le nonce donc vint trouver monsieur le cardinal a Conflans, et par l’entremise du pere Josef, fit retarder cette procedure jusques a ce qu’il en eut donné avis au pape, lequel il faisoit esperer qu’il donneroit quelque contentement au roy.
Un bruit courut allors que le roy avoit dit a monsieur le cardinal qu’il avoit sur sa conscience de me retenir sy long temps prisonnier, et que, n’y ayant aucune chose a dire contre moy, il ne m’y pouvoit retenir davantage ; a quoy monsieur le cardinal respondit que, depuis le temps que j’estois prisonnier, il luy estoit passé tant de choses par l’esprit, qu’il n’estoit plus memoratif des causes quy avoint porté le roy de m’emprisonner, ny luy de luy conseiller, mais qu’il les avoit parmy ses papiers, et qu’il les chercheroit pour les montrer au roy. Je ne sçay sy cela est vray ; mais le bruit en courut par Paris.
Ce mesme mois la duchesse de Savoye fit jetter un secours de seise cens hommes dans Vercel quy estoit pressé par le marquis de Leganes. Ce furent des forces de Piemont quy y entrerent ; mais ce furent
