Vallette eut aussy commandement expres du roy par un gentilhomme que il luy envoya, de le venir trouver ; a quoy il promit d’obeir, et ayant pris congé de Mr le Prince, pres duquel il estoit, partit pour s’y acheminer ; mais au lieu de venir a la court, il fut trouver son pere a Plassac, et de là estant passé en Medoc s’embarqua dans un vaisseau escossois pour se mettre en seureté hors de France, le 19me de ce mois.
La reine mere aussy, quy avoit sejourné quelque temps en Hollande, apres y avoir visité toutes les belles villes du païs, s’embarqua pour se retirer en Angleterre.
Finalement le duc de Lorraine, ayant voulu tenter de jetter un secours de vivres dans Brisac, fit ses preparatifs pour cet effet en la ville de Tanne, et manquant de cavalerie pour l’executer, en envoya demander au general de la ligue catholique nommé Geuts, lequel luy envoya quinse cens chevaux avec lesquels et trois mille hommes de pié qu’il avoit, il s’achemina avec son convoy ; mais le duc de Weimarch en ayant eu advis, (on doute sy ce fut par Geuts mesme), et Geuts quy devoit en mesme temps faire un effort de l’autre costé du Rein pour tenter la mesme chose, s’estant retiré sans l’entreprendre, ledit duc eut tout loysir d’accourir au duc de Lorraine avec sa cavalerie quy ayant fait seulement semblant d’attaquer celle du duc de Lorraine quy venoit de Geuts, le 13me jour d’octobre[1], laditte cavalerie de Geuts, sans attendre le choc, s’en fuit, laissant l’infanterie avec les char-
- ↑ La Gazette de France et le Mercure françois assignent à cette affaire la date du 15 octobre.
