quy commandoit la flotte d’Espaigne, quy avoit heureusement ammené un grand secours d’hommes et d’argent en Flandres, entreprit de partir des ports d’Angleterre pour s’en retourner en Espaigne : mais l’armée navale des Hollandois, commandée par leur general Tromp[1], ayant attaqué la flotte espagnole[2], elle la mit en desroutte, ayant bruslé plusieurs vaisseaux, pris d’autres, et fait eschouer quelques autres en des costes ennemies.
Novembre. — Au commencement de ce mois de novembre, Mr le comte de Harcourt, nouveau general de l’armée du roy en Italie, quy, des le mois precedent, estoit arrivé a Carignan[3], la tresve estant finie des le 24me d’octobre, se prepara pour jetter quelque secours d’hommes dans Casal, que la peste en avoit despourveu. Il part donc de Carignan avec une fort petite armée, mais fort deliberée de bien faire, et dont la cavalerie est la meilleure de toute celle du roy, et vint assieger Quiers[4], quy luy fit peu de resistance, bien que les ennemis fussent a la veue de la ville pour la venir secourir, et plus forts que l’armée françoise ; apres quoy il fit promptement marcher son armée droit a Casal ou il jetta mille hommes de pié dedans, et puis s’en vint reprendre son logement de Quiers. Le marquis de Leganes et le prince Tomas de Savoye, quy avoint chascun une armée plus forte que celle du
