Page:Bassompierre - Journal de ma vie, 4.djvu/42

35

1629. avril.

---

nement a Suse, le priant de se haster d’y venir prendre sa bonne part, et a la gloire, et au peril. Il fit response au roy, comme Sa Majesté arrivoit a Briançon, que, comme il s’acheminoit [pour le trouver]^[1], il avoit appris le partement de madame la princesse Marie dont il avoit esté sy touché qu’il s’en alloit a une de ses maisons passer son desplaisir et y attendre les commandemens de Sa Majesté. Sur cela ayant entendu comme le roy avoit forcé le pas de Suse, et ses ennemis a luy accorder tout ce qu’il avoit desiré d’eux, il s’en retourna à ses journées, ayant escrit a la reine sa mere qu’il la supplioit de ne permettre que la princesse Marie sortit de France, laquelle madame de Longueville ammenoit vers Paris, et M^r le Grand estant party d’aupres de Monsieur pour venir a Paris, donna l'allarme a la reine que Monsieur vouloit enlever la princesse Marie et l’espouser : sur quoy elle envoya arrester madame de Longueville et elle^[2], et les fit mener et tenir sous seure garde dans le bois de Vincennes. Monsieur envoya s’en plaindre a la reine sa mere, et envoya aussy un gentilhomme au roy lequel luy fit response qu’il n’avoit rien sceu avant l’arrest de la princesse Marie, mais qu’il approuvoit tout ce que la reine sa mere avoit fait, comme l'ayant fait pour le bien de son service. Sur cela Monsieur tesmoygna son mescontentement. Monsieur le cardinal n’approuva pas trop cette capture, ce quy donna du mescontentement a la reine mere, laquelle, persuadée par le car-

1. Inédit.
2. Ce fut le 11 mars que la reine-mère fit prendre à Coulommiers la duchesse de Longueville et sa nièce, qui furent conduites le même jour au château de Vincennes.