Nouvelles vindrent de Sommieres que Mr le Comte se portoit tres mal.
Le mardy 10me Mr de Chomberg et moy vinmes le matin a Uses pour donner les ordres necessaires. Le roy y arriva le soir.
Le mercredy 11me nous sejournames a Uses attendant les ostages de Nismes.
Le jeudy 12me le general d'Avignon[1] vint faire la reverence au roy : je le traittay.
Mr le Comte fut a l’extremité de sa maladie.
Le vendredy 13me nous eumes les ostages de Nismes, et leurs deputés vindrent supplier le roy de vouloir honorer leur ville de sa presence.
Le samedy 14me le roy vint a Nismes, passa par le fort des Moulins, et vit celuy de la tour de Maignes. Il fut fort bien receu ; puis il alla voir les arenes.
Le dimanche 15me le roy partit de Nismes pour s’en retourner en France, et me laissa avec monsieur le cardinal pour commander les armes sous luy aux huit provinces ou son pouvoir s’estendoit, dont plusieurs grands furent bien marris. Nous le fusmes conduire jusques a my chemin de Montfrin[2] ou il alla coucher, et revinmes a Nismes.
Il y eut quelque petite esperance de la santé de Mr le Comte.
Le lundy 16me nous sejournames a Nismes et y tinmes conseil. Mr de Guyse en partit et alla voir Mr le Comte a Sommieres.
Le mardy 17me Mr d’Effiat traitta Mrs les mares-
