Mais quant l’ueil ne voit pas la chofe,
Il n’i puet riens, ains ſe repoſe :
Et auſſi qui de l’ueil eſlongne,
Il ne fait pas bien ſa beſongne ;
Qu’Amours ſe vuelent près tenir
Qui en vuelt à joie venir.
Si fis ceſte balade cy,
Ains que me partiſſe d’icy.
Lors vint li vallés de Gaſcongne,
Qui avoit bien fait ſa beſongne ;
Je li baillay celle eſcripture,
Si s’en ala grant aléure.
Quant ma dame eſt noble & de grant vaillance,
Et je me ſens de tres-petit affaire,
Je n’en puis mais ſe je ſuis en doubtance
Que je n’aie moult durement à faire,
Ainſois que j’aie s’amour.
Car moult petit priſera la clamour
De mon vrai cuer, & la grant loyauté ;
Si m’ara toſt, ſelon droit, oublié.
Et s’aucuns ont parlé pour ma grevance,
Qui ſont à moi haÿneus & contraire,
S’elle les croit, c’iert pechiés & enfance ;
Mais en li eſt de moi faire ou deffaire :
Or en face ſon millour !
Qu’en moi jamais mon cuer n’ara retour,
Ains ſera ſiens tous, & contre ſon gré ;
Si m’ara toſt ſelon droit oublié.
Amours ſcet bien que j’ay grant deſplaiſance
Touſdis en ce que li porroit deſplaire,
Et que j’ay mis cuer, deſir & plaiſance
En faire ce qui li puet & doit plaire.
