Et quant en riens la meſcréoie
Que ſes cuers ne fuſt tous en mi ;
Et ſouvent en diſoit : « aimmi ! »
Qu’Amours li diſoit : « Belle, plain te. »[1]
Si commença ceſte complainte :
Mais pour ce onques ne me maudit,
Et ſavez-vous qui le me dit ?
Celle qui là preſente eſtoit,[2][App. XV.]
Et qui la chauſſoit & veſtoit.
Mes dous amis à vous me veuil-je plaindre,
Dou mal qui fait mon cuer palir & taindre ;
Car de vous vient, ſi le devez ſavoir,
Ne ſans vous ſeul confort ne puet avoir.
Or veuilliés dont entendre ma clamour,
Et aveuc ce conſiderer l’amour
Dont je vous aim, car briefs ſeroit ma fin,
Se ne m’amiez de cuer loial & fin.
Amis, je n’ay nulle joieuſe vie,
Ains ſuis touſdis en grant merencolie,
Car je ne fais nuit & jour que penſer
À vous véoir : mais po vault mon penſer,
Quant il n’eſt tour, ſoubtilité, ne voie,
Ne manière que j’y ſache ne voie ;
Si qu’ainſi ſont mi mortel ennemi
Tuit mi penſers, & touſdis contre mi :
Si n’ay confort, amis, fors que tant plour,
Que je cuevre ma face de mon plour.
Et quant je ſuis ſaoule de plourer,
Souvenirs vient mon las cuer acorer ;
Car il n’eſt biens ne joie qu’il m’aporte,
Ainſois tous dis me grieve & deſconforte ;
