Qu’ainſi comme il eſt, & ſans gloſe.
Car contre ſon commandement
Feroie du faire autrement :
Et, puiſqu’il li plaiſt, il m’agrée,
S’obéiray à ſa penſée.
Mais quant je vins à mon hoſtel,
Aſſaut en ma vie n’os tel ;
Car Honte me vint aſſaillir[1][App. XXV.]
Dont je cuidai bien, ſans faillir,
Qu’elle me déuſt eſtrangler.
Onques-mais ourſe ne ſangler
Ne beſte, tant fuſt fourſenée,
Ne vi venir ſi aïrée.
Et quant elle vint contre mi,
Par Dieu tout li ſans m’i frémi ;
Car moult haut diſt : « Certes, amis,
« De folie t’ies entremis,
« Qui vués la plus tres-belle amer
« Qui, deçà mer ne delà mer,
« Soit congnéue ne trouvée.
« Tu dois bien haïr la journée
« Que premierement la véis,
« Ne que delez li t’aſſéis ;
« Car vraiement tu n’ies pas dignes
« Par dis ne par fais ne par ſignes,
« Seulement de li deſchauſſier.
« Et ſi t’ies volu avancier
- ↑ On va voir ici que Machaut, en s’étendant ſur ce que lui repréſentent tour à tour dames Honte & Eſpérance, ne ſonge à intéreſſer que ſa maitreſſe. Ce débat de la Honte & de l’Eſpérance nous paroîtra un peu long, quoiqu’il ſoit ici bien a ſa place.
