« D’Alixandre, & la grant richeſce
« De Noiron, & la grant biauté
« D’Abſalon, & la loiauté
« Du roy David qui fu loiaus,
« Et la proeſce de Ayaus,[1]
« Et joneſce à ta volenté,
« Et de toute grace plenté,
« Ne porroies-tu deſſervir,
« Toute ta vie, par ſervir,
« Tant que tu péuſſes ſouffire
« À tel dame amer, à voir dire.
« Et en riens n’as recongnéu
« Les biens dont elle t’a péu.
« Cuide-tu qu’il ne l’en ſouveingne,
« Et que pour coquart ne te taingne ?
« Certes ſi fait, & ne t’en doubte,
« Qu’honneur & vaillance ſcet toute. »
Et quant je fui bien heraudés,[2]
Si com joué éuſſe aus dés
M’onneur & toute ma chevance,
Et j’eus bien oÿ ceſte dance,
Envers li me vols eſcuſer.
Mais elle n’en fiſt que ruſer ;
N’onques oÿr ne me deingna,
Et plus de cent fois ſe ſeingna
De la honte & dou grant meffait
Que j’avoie à ma dame fait.
Après Honte, Eſpoirs m’apella,
Page:Machaut - Le Voir Dit, 1875.djvu/141
Le texte de cette page a été corrigé et est conforme au fac-similé.
[vers 1999]
87
DU VOIR-DIT.
