Et la belle me reſpondi
Tantoſt, que plus n’i atendi :
Tres-dous amis, quant je vous voy
Vous faites mon cuer resjoïr,
Nulle doleur ne maint en moy,
Tres-dous amis, quant je vous voy.
Ne il n’eſt triſcece n’anoy,
Ne meſchief qui me puiſt venir,
Tres-dous amis, quant je vous voy,
Vous faites mon cuer resjoïr.
Lors me pria que je préiſſe
Matere en moy dont je féiſſe
Choſe de bonne ramembrance ;
Si fis ainſi, en ſa preſence :
Le bien de vous qui en biauté floriſt,
Dame, me ſait amer de fine amour ;
Voſtre biauté, qui touſdis embeliſt,
De dous eſpoir me donne la ſavour.
Voſtre douçour adouciſt ma dolour,
Vos maniere m’enſeingne & me chaſtoie,
Et vos regars maintient mon cuer en joie.
Vos dous parlers me ſouſtient & nouriſt
En flun de joie & de toute douçour,
Voſtre ſage maintien ſi m’enrichiſt,
Qui me contraint à haÿr desbonnour.
Vos gentils cuers me fait plus de tenrour
Qu’en .c. mil ans deſſervir ne porroie,
Et vos regars maintient mon cuer en joie.
Ainſi vos bien à cent doubles meriſt,
Sans deſſerte, mon amoureus labour,
Et ſans rouver ; qu’en moy n’a fait ne dit,
Grace, povoir, ſens, bonté ne valour,