Et moult parfondement muſoie ;
Et la tres-belle s’en perçut.
Oiez comme elle me deçut :
Arrier ſe traiſt tout bellement,
Et s’en ala iſnellement
Faire un moult joly chapelet
Qui me ſembla trop doucelet :
Car il eſtoit de nois muguettes,
De roſes & de violettes.
Et quant elle l’ot trait à chief,
Mettre le vint deſſus mon chief ;
Et ſi me fiſt une ceinture
La plus belle qu’onques Nature
Féiſt puis qu’elle fuſt créée,
Ne depuis qu’Eve fut fourmée.
Ce fu de ſes deulz braſſelés,
Lons & traitis, plus blans que lès,
Et parmi mon col les poſa.[1]
Et un petit ſe reposa ;
Et me diſt : « Mes amis tres-dous,
« Dites moy, à quoy penſez vous ? »
Je reſpondi : « Ma douce amour,
« J’ay fait pour vous une clamour,
« Laquele volentiers arés,
« Et s’il vous plaiſt vous la ſarés. «
Lors dou ditter moult me pria
Et je li dis ; ainſi y a.
- ↑ La ceinture de notre Machaut valoit bien le collier d’Hernani :
Mais tu l’as le plus doux, le plus beau des colliers,
Les deux bras d’une femme…
d’autant mieux qu’une femme peut faire de ſes bras plus aiſément une ceinture qu’un collier.
