Page:Machaut - Le Voir Dit, 1875.djvu/196

142

[vers 3320]

LE LIVRE

Eſt tous les jours en feu & s’art ;
Et quant il advient qu’on l’en oſte
On le gette en un coing d’encoſte ;
Mais quant li fus en eſt eſtains,
Il eſt noirs & bruys & tains.
Ainſi eſt-il des amoureus
Qui ſont plains de maus ſavoureus :
Et quant leur deffenſe eſt petite,
Deſirs les aſſaut & deſpite,
Et les fait à martire offrir.
Si, n’ont confort fors de ſouffrir.

Quant nous éuſmes deviſé
De nos amours, je m’aviſé
Que li feroie une requeſte
Qui me ſembloit aſſez honneſte.
Si li di : « Belle, bonne & ſage,
« Vous devés un pelerinage,
« Ce m’a-on dit, à Saint-Denis.
« Bien ſeroit or mes maus ſenis,
« Se le vous plaiſoit apaier,
« Mais que fuſſe voſtre eſcuier :
« Une heure vault une ſemaine,
« Et un bon jour, quant Dieus l’amaine,
« Vault bien .iii. mois, n’en doubtez mie.
« Si que, ma belle douce amie,
« Je vous pri que vous le paiez,
« Et que ce pas ne deſlaiez. »
Et elle reſpondi en l’eure :
« Dous amis, ſe Dieus me ſequeure,
« De ce faire pas ne recroy :
« Et vous ſavez aſſez, ce croy,
« Que je ne ſuis pas mienne dame ;